عمران نذیر نے 3 دن جیل کیوں گزارے؟ سابق کرکٹر کا انکشاف

اسلام آباد(نیوز ڈیسک) سابق پاکستانی کرکٹر عمران نذیر نے انکشاف کیا ہے کہ انہوں نے 3 دن جیل میں گزارے۔سابق کرکٹر عمران نذیر نے ایک پوڈکاسٹ میں ایئرپورٹ پر بیگ سے پستو ل نکلنے کا واقعہ بیان کیا اور کہا کہ میرا دل صاف ہے، یہ واقعہ سب کو پتا ہے، تحقیقات کے بعد کچھ بھی نہیں نکلا۔

انہوں نے کہا کہ ان دنوں میں مریدکے میں رہتا تھا اور اتنا زیادہ سفر نہیں کیا تھا، میرانام جنوبی افریقا کے خلاف انڈر 19 ٹیم کے لیے آیا، ہم لوگ کراچی آرہے تھے۔عمران نذیر نے کہا کہ ایئرپورٹ پر مشین سے گزرنے پر مجھ سے پوچھا گیا کہ یہ بیگ کس کا ہے جس پر میں نے کہا کہ یہ میرا ہے۔سابق کرکٹر نے بتایا کہ ایئرپورٹ پر مجھ سے 3 مرتبہ پوچھا گیا کہ بیگ کس کا ہے جس پر میں نے کہا کہ میرا ہے، پھر مجھے الگ کر دیا گیا، بیگ کے اندر اوپر ہی پستو ل اور گو لیا ں پڑی ہوئی تھیں۔عمران نذیر نے کہا کہ شروع میں مجھے لگا کہ یہ کھلونے ہیں لیکن وہ سب اصلی تھا، میرے پیروں کے نیچے سے زمین نکل گئی تھی۔انہوں نے کہا کہ اس واقعے کے بعد مجھے ہتھکڑ ی لگی اور 3 دن جیل میں رہا پھر پی سی بی بھی اس معاملے میں آ گیا، جیل میں مجھے طریقے سے رکھا گیا تھا۔عمران نذیر نے کہا کہ جب آپ کی نیت اچھی ہوتی ہے تو پھر آپ کے ساتھ کبھی برا نہیں ہو سکتا، جیل میں وہ 3 دن 30 سال کی طرح لگے۔انہوں نے کہا کہ جیل سے واپسی پر کوچز نے سکھایا کہ اس واقعے کو ڈراؤنا خواب سمجھ کر بھول جاؤ اور کرکٹ پر توجہ دو۔